Ik sweve efter jo oan nei boppen
Yn ’e omrinwinkel fan de oksepripper
Triem foar triem haw ik jo besnuve
Willich as in loene lotbeskikker
Want och, wat rûkte jo lekker, mefrou
Nei tateblomkes en toverhazenút
Nei heidehúning en kraaltsjeblommen
Yn ’e omrinwinkel fan de oksepripper
Ik wie tige op jo stal fiksearre
Jo droegen suêdeskuon sa giel as sân
Fjouwer smelle skouderbantsjes
En in trouring oan jo rjochterhân
Mar wat rûkte jo dochs lekker, mefrou
Nei Acapulco Gold en bûtere klûtsjebôle
Nei patsjoely en besjerpe pankoeken
Yn ’e omrinwinkel fan de oksepripper
Boppe stiene jo foar in steande spegel
Ik haw jo doe temûk beglûpe
En helle jimme beide oan yn gedachten
In twilling yn dûbelbleate simmerjûpe
By ’t opskikguod pakte jo in halsketting
Jo beseagen it yn wytgleon neonljocht
Uteinlik keazen jo in koperen doekspjelde
Ik tink út skaaieskarrel libbensnocht
By de platekast bûgde jo fier foaroer
Sa seach ik doe dy iene inkelplak
Ik soe wat sizze, ik woe wat dwaan
Mar dat wie altefolle ûngemak
Wat rûkte jo dochs lekker, mefrou
Nei piña colada op Karibyske strannen
Nei dreamidylle en mankelikens
Yn ’e omrinwinkel fan de oksepripper
Ik sweve foar jo fuotten de trep wer del
Mei in kopy fan in Russyske ikoan
Och hearkes, wat woe ik jo oanbidde
En wat fielde dat deagewoan
Wêr fûn ik jo sa lekker nei rûken, mefrou,
Yn ’e omrinwinkel fan de oksepripper?
Nei subtile deftichheid of Switsalsalve?
Nei goederjouskens of mem har âldeklonje?
Jo feintsjelok wie sa wolbehaachlik, mefrou
Ik sweefde op nostalgyske hertstocht
As oantinken oan jo swiete krêft, mefrou
Haw ik foar in kwartsje dat kettinkje kocht
Lomme
Reactie plaatsen
Reacties